झूटा शिक्षाहरूबाट कसरी जोगिने र जोगाउने? - Is A Faith Based Blog
आलेख

झूटा शिक्षाहरूबाट कसरी जोगिने र जोगाउने?

आजको समयमा निकै होसियारी अपनाउनु पर्ने देखिन्छ । झूटा शिक्षाहरू च्याउ उम्रे झैँ जताततै उम्रेका छन् । फेरि यिनीहरूको पोस्टमा लाइक, शेयर र कमेन्टमा ‘आमेन’ लेख्ने हाम्रा धेरै सोझा-साझा विश्वासीहरू पनि छन् । यस्तो विकराल परिस्थितिमा पनि के हामी मण्डलीहरू शान्त भएर बस्ने होकि प्रतिकार गर्ने हो? समयमा नै यदि सावधानी अपनाएनौ भने झूटा शिक्षाहरूले तीव्र गतिमा धेरैलाई बहकाउन सक्षम हुनेछ | कति विश्वासीहरूलाई त झन् झूटा शिक्षाहरू बारे पर्याप्त ज्ञान नै नहोला | धेरै जसो विश्वासीहरू घरेलु संगति, मण्डलीको साप्ताहिक सेवा तथा विशेष सेवा, बाइबल कलेज अनि क्याम्पहरूमा मात्र निर्भर रहन्छन | फेरी हाम्रो परिवेशमा अधिकांश नैतिक शिक्षा, प्रचार र आराधना सित सम्बन्धित सिकाइ मात्र पाइन्छ | त्यसै कारण आज सारा मण्डली जागरुक हुनु आवश्यक देखिन्छ |

त्यसोभए के गर्न सकिन्छ होला ?  

१. सर्वप्रथम त मण्डलीले विश्वासीहरूलाई बाइबलीय आधारभूत सिद्धान्तहरू बारे सिकाउन नितान्त आवश्यक छ किनकि हाम्रो दैनिक ख्रीष्टिय जीवन यापन हामी जे कुरामा विश्वास गर्दछौं त्यसैमा आधारित रहेको हुन्छ । मण्डली केवल प्रचार (preaching) को लागी मात्रै होइन । सहि शिक्षा (Sound Doctrinal Teaching) को लागि पनि हो । बाइबल कलेजमा मात्रै पनि भर नपर्नुहोस् र बाइबल कलेजबाट डिग्री हासिल गरेकाहरूले मण्डलीमा पनि सेवा गर्ने काम गरून्, सिकाउने काम गरून् ।

२. विश्वासीहरू संगति, साप्ताहिक सेवा, क्याम्प लगायत अन्य तालिमको समयमा आफूले सिकेका विषय वस्तुहरूमा छलफल र अन्तरक्रियामा सामेल हुनु उचित देखिन्छ । यसले बौद्धिक स्तरबाट पनि आफ्नो विश्वासलाई नियाल्ने र विश्लेषण गर्ने अवसर सबैले पाउछन |

३. बाह्य वातावरणमा घुलमिल हुँदा आफ्नो विश्वास भन्दा बेग्लै केहि अनौठा जानकारीहरू सुन्नमा आए मण्डलीका अगुवा, एल्डर, पास्टर तथा मित्रहरू संग छलफल गर्ने बानी बसालौँ । जस्तैः परमेश्वरको अर्को देह धारण यस धर्तीमा मुक्ति दिलाउन जन्मिए रे[1], येशूको बलिदान पर्याप्त थिएन रे[2], बाइबलमा अझै अरू पुस्तकहरू पनि थप्न पर्ने देखियो रे, येशू यो साल, यति तारिखमा फर्कनु हुनेछन् रे, येशू परमेश्वर होइनन् रे, व्यवस्थाहरूको पालन मुक्तिको लागि अत्यावश्यक छन् रे, आदि ।

४. झूटा शिक्षा, गलत शिक्षा, मत भिन्नता (Heresy, Error and Difference in opinions) आदि विविध दर्जाका शिक्षालाई छुट्टाउने योग्यता सबै विश्वासीहरू हुन सक्न पर्छ । सम्प्रदायिक शिक्षाहरू (Denominational stands) प्रायः मत भिन्नता र गलत अवधारणा अन्तर्गत पर्दछन् । यी सबैलाई दोश्रो दर्जाका शिक्षाको रूपमा लिइन्छ भने झूटा शिक्षाले प्राथमिक दर्जाका शिक्षाहरूलाई नै आक्रमण गर्ने गर्दछ ।

५. यसै कुनै पनि संगतिहरूमा सामेल नहोऔँ तर पूरा जाँचेर मात्र सहभागिता जनाऔँ । आफ्नो मण्डलीलाई जानकारी दिन नभुलौँ । सतही शिक्षाहरू समावेश भएका पोस्टहरूमा परमेश्वर, येशू, पवित्र आत्मा, आदि शब्दहरू देख्दैमा वा आश्चर्यकर्महरू देख्दैमा “आमेन” लेख्दै तिनीहरूका पछि लाग्न छोडौँ । गहिरिएर सिद्धान्तहरूलाई परिक्षण गरौं ।

६. त्रीएकता, येशूको ईश्वरत्त्व, पवित्र आत्माको व्यक्तित्व, येशूमा पापको क्षमा, स्वर्ग-नरकको सत्यता, येशूमा मात्रै उद्धार आदि जस्ता शिक्षाहरू विरुद्ध आउने सबै शिक्षाहरू झूटा हुन् ।

७. बाइबल “पढ्ने” मात्र काम नगर्नुहोस् तर “अध्ययन”, “विश्लेषण” आदि गर्नमा समय बिताउनुहोस् । आजको युगमा अध्ययनका लागि धेरै सामग्रीहरू उपलब्ध छन् । एक-एक पदका आधारमा नै डरलाग्दो झूटा शिक्षाहरू निर्माण भएका छन् । जस्तैः येशू नै माइकल स्वर्गदूत हुन् (येहोवाका साक्षीहरू), पूर्वबाट बिजुली चम्केर पश्चिम सम्म नै उज्यालो हुने गरि मानिसको पुत्रको आगमन हुनेछ र आज भएको छ (Eastern lightening church), आदि ।

८. साम्प्रदायिक शिक्षाहरू/ दोश्रो दर्जाका शिक्षाहरूको आधारमा झूटा शिक्षालाई नाप्ने काम नगर्नुहोस् । जस्तैः चङ्गाई, अगमवाणी, दर्शन, अन्यभाषा, बप्तिस्माको विधि, प्रभु भोजको विधि, पूर्वनिर्धारण र स्व-इच्छाका विविध सिद्धान्तहरू आदि । यसले झन् बढी भ्रम फैलाउने काम गर्दै आएको छ । जस्तैः सच्चाई केन्द्र

९. झूटा शिक्षालाई कहिल्यै पनि हाँसो-मजाक र हल्का तवरले नलिनुहोला । नयाँ नियम भरि नै झूटा शिक्षा बारे चेतावनी यसै दिइएको होइन । सदैव सतर्क रहनु होला ।

१०. “म परमेश्वरको सुरक्षाको घेरामा छु, प्रार्थना निकै गर्छु, बाइबल दिनहुँ पढ्छु, पवित्र आत्मा साथमा छन् त्यसैले मलाई कसैले भ्रममा पार्न सक्दैन । अध्ययन, संगति आदि केही आवश्यक छैन ।” जस्ता भावनात्मक अभिव्यक्ति तथा विचारमा कहिल्यै नजिउनु होस् । हाम्रो विश्वास बौद्धिक पनि हो र सुसमाचार र विश्वासलाई प्रतिरक्षा गर्ने गम्भीर जिम्मेवारी पनि उहाँले नै दिनुभएको छ भन्ने कुरो याद गर्नुहोस् ।

धन्यवाद

– केभिन श्रेष्ठ
नव जिवन एजी चर्च, ललितपूर

थप कुरा: यहाँ उल्लेखित बुँदाहरूमा मात्र पनि सिमित नरहनुहोस् । अध्ययनमा समय बिताउनुहोस् ।

[1] “What Is the Church of Almighty God / Eastern Lightning?,” GotQuestions.Org, accessed November 8, 2022, https://www.gotquestions.org/Church-of-Almighty-God.html.

[2] Ibid.

Facebook Comments Box

Related Articles

Leave a Reply

Your email address will not be published. Required fields are marked *

Check Also
Close
Back to top button